Qaranlıq dünyanın sakinləriyik,
Aldığın nəfəs də müvəqqətidir.
Bağışla, qəlbimi vermərəm sənə,
Ötən günlərimin əmanətidir.


Deyirsən:-"Sabaha ümidlə boylan"
Gözlərim gülsə də intizarlıdır.
Dünənlər ömrümdən alsa da mənim,
Hər gələn günümdən etibarlıdır...


Gəl sən sabahlara çox da güvənmə,
Onlar da haçansa dünən olacaq.
Sabahın verdiyi şirin vədləri,
Dünənlər yaşada bilərlər ancaq.


O, ötən illərim qayıtmasa da,
Ömrüm xatirələr yığıncağıdır.
Yerlərə,göylərə meydan oxuyan,
Qəlbim, hisslərimin oyuncağıdır.


Sən demə qurduğum eşq yuvasını,
Sənin əllərinlə hey yıxırmışam.
Səndən aldıgımı bir sərvət bilib,
Sən demə ömürlük borc yığırmışam.


Borc verən borclunun salığın istər,
Bax yenə danışdı dilbilməz dilim.
Sən mənim borcumu qaytar ki,mənə,
Mən də borclarımı qaytara bilim.


Daha aldatmayaq bir - birimizi,
Lənətlər yağdırıb mələklər bizə.
Nə qədər dansaq da bu həqiqəti,
Həmişə borcluyuq bir-birimizə.


Nə o tənha ulduz, nə bədrli ay,
Daha xatırlatmır səni hər gecə.
Sənin də borcların az deyil mənə,
Odur ki, mənimtək unut sadəcə!