Səpələnib tökülmüşük çöllərə,
Gündə bu söz təkrar olur yüz kərə.
Xeyli vaxtdır həsrətik o yerlərə,
Ayrılıqdı könüllərin dayəsi,
Allah, yoxmu bu millətin yiyəsi?
.
Yaranandan belə qaragünlüyük,
Özgəyə yox, özümüzə süngüyük.
Baş açmıram, deyir, - şiə, sünnüyük,
Düz oxunmur Quranın da ayəsi,
Allah, yoxmu bu millətin yiyəsi?
.
Eloğlu, sən lap utanıb qızar da,
Yoxsulluqdan adam yolun azar da,
Alim, şair alver edir bazarda,
Üzdü məni nadanların tənəsi,
Allah, yoxmu bu millətin yiyəsi?