Ömür hələ bol ikən,
Şəkər ikən, bal ikən,
Bir parça halal tikən, -
Çörəyin ola, sevəsən...
.
Tapınmağa fələyin,
Bürünməyə bələyin,
Vurulmamış biləyin,
Kürəyin ola, sevəsən...
.
Yüyürəndə çatmağa,
Kölgəsində yatmağa,
Yıxılanda tutmağa
Dirəyin ola, sevəsən...
.
Kirpiyin gor qazıya,
Dil-dodağın susuya,
Bir ümidə, arzuya
Gərəyin ola, sevəsən...
.
Çiçək boyda, gül boyda,
Qaranquş, bülbül boyda,
Bapbalaca, əl boyda
Ürəyin ola, sevəsən!