Səni qısqanıram kədərə, qəmə,
Sənin gözlərində yaş görəndə mən.
Ürəyim daş olmaq istəyir hərdən,
Ayağın altında daş görəndə mən.
.
Səni qısqanıram, paxıllığından
Payını bölməyən uşaqlar kimi.
Hardasa adını eşitdiyimdə
Yanıram his verən çıraqlar kimi.
.
Səni qısqanıram sərt küləklərə,
Küləklər saçını dalğalandırır.
Solmuş təbiəti, bağı, bağçanı
Sənin ətrin ilə qidalandırır.
.
Səni qısqanıram yağan yağışa,
Bir çətir altında gizlədir səni.
O zaman Allahdan istəyirəm ki,
Ya yağış yaratsın, ya çətir məni..