Bir kimsəylə bir özgəylə işim yox,
Apar məni uzaqlara qaranquş.
Nə bir dostum, nə də bir sirdaşım yox,
Apar məni uzaqlara qaranquş.
Daha gedək buralara qış gəlib,
Üşüyürəm, qar gəlib, yağış gəlib,
Ürək dolub, gözlərimə yaş gəlib,
Apar məni uzaqlara qaranquş.
Sevgisizəm, ürək olub daş kimi,
Tapılmır ki, ürəyimin hakimi,
Bəlkə tapdım uzaqlarda sevgimi,
Apar məni uzaqlara qaranquş.
Məni göyə götürəsən hələ ki,
Buludlarda itirəsən hələ ki,
Yaz gələndə gətirərsən, hələ ki
Apar məni uzaqlara qaranquş.
Apar məni viran olubdur bağım
Nələri ki, aparacam qoy yığım,
Daha burda bilinməyir varlığım
Apar məni uzaqlara qaranquş.