Mən səni sətir-sətir,
Heca-heca unutdum.
Həsrəti qədəh-qədəh,
İçə-içə unutdum.

Keçib yağışı, qarı,
Tutub əhdi-ilqarı,
Qaranlıq qapıları
Aça-aça unutdum.

Ürəyi yuxa-yuxa,
Dərd məni yıxa-yıxa,
Dişimi sıxa-sıxa,
Qıca-qıca unutdum.

Qaçdım sənli səs-küydən,
Düşdüm taqətdən, heydən,
Sənlə bağlı hər şeydən
Keçə-keçə unutdum.

Eyş-işrət, falan-filan...
Hər gün başqa bir yalan,
Adını dalan-dalan...
Küçə-küçə unutdum.

Mən səni hərif -hərif,
Heca-heca unutdum.
Həsrəti qədəh-qədəh
İçə-içə unutdum.