Bu gecə yenə də yata bilmədim
Divarlar üstümə gəlirdi sanki.
Aynadan boylanan gülərüz rəsmi
Pərişan halıma gülürdü sanki…

Özüm də, otaq da duman içində,
Dəyişdim qısa bir zaman içində
Xəyallar içində, güman içində,
Mənimlə xəyala dalırdı sanki…

Bir anlıq, olanlar yadıma düşdü,
O anda əhvalım, halım dəyişdi,
O, belə gözümə görünməmişdi,
Yerini yanımda salırdı sanki...

O, idi eşqimin odu, ocağı,
O, mənə öyrətdi unutmamağı,
Uzanmış olduğum yatağın ağı,
Mənim üzümə ağ olurdu sanki…

Həmən o saat, o dəqiqələrdə,
Özümdən çıxdığım o radələrdə
Rəsmi də aynada, həmənki yerdə,
Gülərək könlümü alırdı sanki…