Demə, mənə görə uzaqlaşırsan,
Bu sözü dilinə gətirmə bir də.
Yaşaya bilmədin mənim yanımda,
Yaşa bundan belə xatirələrdə…

Sən ki, böyümüsən, uşaq deyilsən,
Sorğusuz, sualsız, icazəsiz get.
Şair yaxşı deyib, deyim sən də bil,
"Getmək istəyirsən, bəhanəsiz get"

Bütün günahları yıxıb üstümə,
Özünü günahsız adam bilirsən.
Nədir ki, küsülü qalmışıq biraz,
Bunu ayrılığa məqam bilirsən…

Əl çəkə bilmədin bu adətindən,
Bir söz deyəndə də uşaqlaşırsan.
Böyük təsəllidir, yalan da olsa,
Güya sevə-sevə uzaqlaşırsan…

Getməmiş deyim ki, bir istəyim var:
Bu, "dəlim" sözünü demə heç kimə.
Kimsə səhv anlayar küsər, inciyər,
Sənə desələr də, yenə sən demə…