Bu gün gəlinlikdə rəsmini gördüm
Kədərli, sevincli görünürdün sən.
Üzündə təbəssüm, gözündə hicran,
Yanında özgəsi, ürəyində mən.

Yadına düşürmü bir vaxt səninlə
Gəlinlik seçərdik biz gülə-gülə?!
İndi o libas var, mən olmasam da
Biri var, biri yox, şükürlər elə...

Bu gün gəlinlikdə rəsmini gördüm
Keçmişim sənə çox həsədlə baxdı.
“Qəzəb”im dağıldı dodaqlarıma
Gözümdən bir damla “təəssüf”axdı.

Qorxuram kədərdə, qəmdə boğulum
Arzular dərindir, həyat dayazdır.
Kaş ki, bu dünyaya bir də doğulum
Səni sevmək üçün bir ömür azdır.

Dərddən içənləri başa düşmürəm
Ağrılar, acılar belə tez ölməz.
Məni heç bir şərab bihuş eləyib
Sənin xəyalından ayıra bilməz.

Bəs bu gün nə edim unudum səni?!
Başıma haranın daşını töküm?!
Nə qədər alışan duyğularımın
Üstünə gözümün yaşını töküm?

Mənim son təsəllim “qismət” sözüdür.
Sən niyə bəxtindən belə küsmüsən?
Nə fərqi sevməyə mən gecikmişəm.
Ya sən sevilməyə çox tələsmisən.

Xoşuma məhəbbət gəlsə də mənim,
Başıma hər zaman intizar gəlir.
“Ölçü”sü neçədir bu xoşbəxtliyin ?
Sənə çox yaraşır, mənə dar gəlir.

Sənsiz olacağam bir ömür boyu
Bəlkə də olmadım, mənə nə var ki.
Sən məni çətin ki, başa düşəsən
Sən sənsiz deyilsən, sənə nə var ki !!!