.
Yağış yağa, pəncərəmi döyəsən,
Bitirəsən həsrətini yolların.
Görəm yenə islanıbdı saçların,
Görəm yenə islanıbdı qolların.
.
Sanki səni suya basıb çəkiblər,
Gözündəki gülüşlərdən su damır.
Əlindəki çiçəklərin islanıb,
Dodağında öpüşlərdən su damır...
.
Yağış yağa, şimşək çaxa nagahan,
Yerə sala dilimdəki sözümü.
Lap qaçaraq uşaq kimi qorxudan,
Yaş sinənə sıxam yenə özümü.
.
Gecə bitə, yağış kəsə, kövrələm,
Göz yaşlarım yenə axa içimə.
Əllərimi ovudasan əlində,
Əllərindən yağış dama gecəmə