Bu cahanın işi bitdi – dirilitdi, dirilitdi,
Ölü lütdü, diri lütdü – dirilitdi, dirilitdi.
Biri coşdu, biri daşdı, biri qapdı, biri qaçdı,
Biri məstan, biri itdi – dirilitdi, dirilitdi, lərəlitdi.
Üzü yumşaq qaloş idi, suya düşdü padoş oldu,
Təzəlikcə qranitdi-dirilitdi-dirilitdi.
Nə geyirsə o sənindi, nə deyirsə o mənimdi,
Nə yeyirsə humanitdi – dirilitdi, dirilitdi.
Harın üçün yüzü azdı, kasıb üçün biri çoxdu,
Görəsən bu nə limitdi? – dirilitdi, dirilitdi.
Dedi "urra" uru çıxdı, suya düşdü quru çıxdı,
Quru üstə yaşı bitdi – dirilitdi, dirilitdi.
Üsul ilə, üsul itdi, ağın üstə qara sürtdü,
Rejim indi usilitdi – dirilitdi, dirilitdi.
Baba Pünhan bir həyatdı, Baba Pünhan zarafatdı,
Sözü duzlu, özü şitdi – dirilitdi, dirilitdi.