Külək saçlarını oxşasa bir gün,
Bil ki o mənəm toxunan sənə.
Mənim yoxluğuma üzülmə birdə,
Üzünü oxşayan xəfif meh mənəm.

Yağışam, çisginəm,şehəm səninçün,
Süzülüb saçını isladıram mən.
Səhər küləyiyəm, mehəm səninçün,
Toxunub cismini üşüdən mənəm.

Aldığın nəfəsdən yaxınam sənə,
Axı damarında vuran nəbzinəm.
Gözlərin yaş dolub üzüldüyündə,
Axı yanağından süzülən mənəm.

Bilirsən..? Mən sənin zərif kölgənəm,
Arxanca gəzirəm gizlincə xəlvət.
Günəşin qüruba endiyi zaman,
Yuxunun qonağı bilirsən?. mənəm.

Sən mənim qəlbimin özüsən gülüm,
Mən sənin qəlbinin tək həmdəmiyəm.
Sənin duyduğunu,məndə duyuram,
Bəlkə də sinəndə döyünən mənəm.

Sevgiyə uzanan yolam səninçün,
Qəlbimdən qəlbinə doğru yönələn.
Bilirəm sevgilim kiməm səninçün,
Bağlı ürəyinin qapısı mənəm.