Ata həsrətilə yanır ürəyim,
Atadır hər arzum, istək, diləyim,
Vəfasız həyatda bircə köməyim,
Onsuz, elə bil ki, zaman dayanır,
Ata nəsihəti könlüm axtarır.

Evin yetim qalıb, ocağın başsız,
Qoydun, getdin bizi, vaxtsız, zamansız,
Qalmışıq tək-tənha, gücsüz, əlacsız,
Həyatda yoxluğun ürək dağlayır,
Ata nəsihəti könlüm axtarır.

Doymayıb bizlərdən nigaran getdin,
Qohumlar yolunda canını verdin,
Hamıya əl tutub, yaxşılıq etdin,
Etdiyin yaxşılıq bizə qayıdır,
Ata nəsihəti könlüm axtarır.

Sən mənə həm ata, həm dost olmusan,
Arxamda çəpər tək daim durmusan,
Bizi ömür boyu sən qorumusan,
Məhz dayaq olmağın məni saxlayır,
Ata nəsihəti könlüm axtarır.

"Bir vaxt deyəcəksiz..." - bizə söylərdin.
"Belə atam vardı..." - tez-tez deyərdin,
Bu zaman kövrəlib, üzdə gülərdin,
Qəlbim o gülüşçün necə darıxır!
Ata nəsihəti könlüm axtarır.

Ey atam, rahat get, qalma nigaran,
Fəxr et övladlarınla, sevin, qürurlan,
Yaddaşlarda qalan, ey müdrik insan!
Sənintək insanlar daim yaşayır,
Ata nəsihəti könlüm axtarır.