Yazığın gəlməsin mənə,
Mən təkliyə alışmışam.
Təkcə xəyallarda sənə,
Dərdlərimi danışmışam.
Mən təkliyə alışmışam.

Qəlbim, sən nə danış, nə din,
Sevgi etdi dərdimi min.
İndiyədək nahaq eşqin
Ətəyindən yapışmışam.
Mən təkliyə alışmışam.

Hər günüm qəm, qüssə-kədər,
Bu yaşamaqdırmı məgər?
Həyatımla mən birtəhər
Qaynamışam, qarışmışam.
Mən təkliyə alışmışam.

Dərdim rahat qoymur məni,
Taqətim qalmayıb yəni,
Alınmayıb, düzdü səni
Unutmağa çalışmışam.
Mən təkliyə alışmışam.

Mən heç, sən xoşbəxt ol təki,
Ölüb ümid qəlbimdəki.
Amma elə zənn etmə ki,
Qismətimlə barışmışam.
Mən təkliyə alışmışam...

*Təşəkkür edirəm. Oxuyan gözləriniz var olsun...*