Sənə məktub yazıram,
Yazıram ki,
Bağışla...
Burda hava pis keçir,
Ara vermir yağışlar.

Tək yatıb, tək durmaqdan
Bezdirmişəm otağı.
Bilirsən...
pinti olur
Yalqızların yatağı.

Yalqızlar az yuyunur,
Gəlir yalqızlardan iy.
Çayları soyuq olur,
Yeməkləri alaçiy.

Çirkli ayaqqabılar...
Dibi yanmış qazança...
Bir qırıq da ümid var;
...qayıdacaq haçansa...

Yalqız sabaha baxmır,
Arzulayır keçmişi.
Çox misgin mənzərədir
Ev yığışdıran kişi.

Hələ bunun gecələr
içib ağlamağı var,
saçin daramamağı,
saqqal saxlamağı var.

Dərd ağır, hava da pis,
Ara vermir yağışlar.
Sənə məktub yazıram,
Yazıram ki,
Bağışla...