ÇÖLÜMDƏ ŞEYTAN.
Mərhum şairimiz Məmməd
Aslanın "İçindən şeytanı qov"
sözlərinə xitabən.

Başına döndüyüm, ay Məmməd qağa,
Bənzərsən gözümdə bir uca dağa.
O qənim kəsilmiş cənnəti-bağa,-
Yer alıb, xar salan... gülümdə şeytan.
İçimdən qovmuşam... çölümdə şeytan.

Haqq astar istəməz... istəyən kimlər?..
Düzünü əyriyə pisləyən kimlər?..
Yolu azanları bəsləyən kimlər?..
Haqqımı talayan elimdə şeytan.
İçimdən qovmuşam... çölümdə şeytan.

Nadanı badaqda, namərdi başda,
İtirə gücünü haqq bu savaşda.
Gözümdən tökülən bu qanlı yaşda,
Canımı isladan selimdə şeytan.
İçimdən qovmuşam... çölümdə şeytan.

Hər yana yer almış riya üzündə...
Doğru sahibləri... ağlar düzündə.
Qəlb külə dönmüşdə, könlü közündə,-
Yanıb qurtarmışam... külümdə şeytan.
İçimdən qovmuşam... çölümdə şeytan.

Əhdini gölərdən gizləyən kəsdə,
Bətni-bəlasın... əzizləyən kəsdə.
Nütfəsi iblisi izləyən kəsdə,
Yükümün qarası... belimdə şeytan.
İçimdən qovmuşam... çölümdə şeytan.

Demişəm, izin ver birdaha deyim,
Alışan donumu birdaha geyim,
Şeytanlıq üz alıb,..- deyim-deməyim...
Dayanar hər zaman yolumda şeytan.
Nurniyyət olsamda...- çölümdə şeytan..!

16.05.1998.