Hərdən yuxularıma gəlirsən gecələri,
Əlindən yapışıram, gəzirik küçələri.
Qarşılamaqçün yenə sənlə birgə səhəri
Yuxumun qapısını bağlayımmı deyirsən?
Ağlayımmı deyirsən?
Arzuladım çox zaman: ,,qəfil çıxıb kaş gələ",
Pəncərəm də bağlıdı, yer də yox ki daş gələ.
Sən qıyardın gözümdən bircə damla yaş gələ?
İndi yoxsan yanımda, ağlayımmı deyirsən?
Ağlayımmı deyirsən?
Səndən gələn son mesaj durur göz dağı kimi,
Şəklin telefonumda ömrümə yağı kimi
Yelə verib günləri çobanyastığı kimi
,,Sevir-sevmir" söyləyib yoxlayımmı deyirsən?
Ağlayımmı deyirsən?
Hələ əksin gözümdə, hələ xatirən həzin,
Oxşamır saçlarımı gör haçandı nəfəsin
Ruhumu dara çəkir yaddaşımdakı səsin
Xatirəni yadigar saxlayımmı deyirsən?
Ağlayımmı deyirsən?