Dərə zülmət, zirvə işıq,
Ormanlarda rəng qarışıq.
Biz hər rəngə qalmamışıq,
Axşama bax, qara saçlım.

Batan günəş baxar aya,
Bulud yanar taya-taya.
Bu göy qurşaqlı dünyaya -
Axşama bax, qara saçlım.

Qaranlıqlar yeriməkdə,
Dağ, dərəni bürüməkdə…
Bir günümüz əriməkdə,
Axşama bax, qara saçlım.

O dağdan səs, ünüm dönməz,
Yaylağından gülüm dönməz.
Günəş dönər, günüm gönməz,
Axşama bax, qara saçlım.

Göydə qanad izi itdi,
Cığırlar zirvədə bitdi.
Gələn gəldi, gedən getdi,
Axşama bax, qara saçlım.

Aşdı dağı yüklü duman,
Əsdi rüzgar, üşüdü can.
Bir az mənə yaxın dayan,
Axşama bax, qara saçlım.