Yüyürüb, yüyürüb dərə boyunca
Düşüm çəmən üstə qoy üzüqoylu.
Öpüm bu lorpağı, Öpüm doyunca,
Üzümə üz qoysım hər soyuq daşı,
Qoy şehə qarışsın gözümün yaşı,
Qurumuş budaqlar içir könlumdən,
Dəli bir ağlamaq keçir könlümdən.

Könlünə dəydiyim,
İncitdiyim qız,
Vüqar kölgəsində yatdığım bəsdir.
Odlu yanağından su içdiyim qız,
Bu qədər günaha batdığım bəsdir.
Daha dodaqların titrəməsin qoy,
Mən sənin qarşında titrəyim, əsim,
Səndən dünyaları istəmirəm, yox,
Məni bağışlasan bəsimdir, bəsim...
Yan desən,
Alışıb yana bilərəm,
Don desən,
Yerimdə dona bilərəm!
İndi bilmişəm ki, ömür-gün gedir,
Ən gözəl hisslərim köçür könlümdən.
Qayıt!
Sən ömrümə təzəlik gətir;
Dəli bir ağlamaq keçir könlümdən.

Çoxdan qəbristana düşməyir yolum,
O tənha məzarı ot basıb bəlkə.
Mənim soyuqluğum, laqeydliyim
Onun sinəsinə od basıb bəlkə.
Bir daş var gözümün yaşına həsrət,
Dayanıb o giley heykəli kimi.
Əlim torpağına, Daşına həsrət,
Yıxılıb üstünə mən dəli kimi
Ağlayam gərək...
O tənha məzarı torpaqdan üzüb
Ovcumun içİndə saxlayanı gərək.
Şöhrətin üstünə yüyürdükcə mən
İstəklər, arzular köçür könlümdən.
Sevgi dumanına büründükcə mən
Dəli bir ağlamaq keçir könlümdən.

Küləklər oynayır kənd evimizdə,
Tale baş götürüb apardı məni.
Hörümçək tor qurub pəncərəmizdə,
Həsrətim çırpınır o torda mənim.
Yarasa boylanır uçuq tavandan
Bükülmüş dirəklər çat-çat olubdur.
Qorxudan divarın bağrı yarılıb,
Qapılar çoxalıb dördqat olubdur.
Gedim divarına yalvarım onun,
Gedim, qapıların qatı açılsın.
Gedim mən sonuncu dirəyi olum,
Tavanlar çiynimə barı uçulsun...
Daşı daş üstünə qoyum təzədən,
Dəlisov küləklər əsir könlümdə!
Elə kövrəlmişəm,
Bilmirəm nədən
Dəli bir ağlamaq keçir könlümdən...