Sən bu xəzan çağımda gəlib qarşıma çıxan
Nahaq salıb taleyin məni sənin yadına.
Mən kül altda köz kimi həzin- həzin darıxan,
Daş da olsa dayanmaz bu atəşin oduna...
Əriyimmi? Bilmirəm...


Məni mənə sevdirən sən imişsən heç demə,
Vaxt olur özümdən də küsürəm, yadlaşıram.
Əllərimin yaddaşı zülm eləyir qəlbimə,
Gözlərinə bənzəyən göz görəndə çaşıram../
Kiriyimmi? Bilmirəm...


Mən öz boyundan uca hasarlar hörən adam,
Mən ki özü- özünə məhbəs tikən biriyəm.
O məhrəm duyğulara çoxdan ögeyəm, yadam,
Yeriyən başdaşıyam, nə olsun ki diriyəm?..
Diriyəmmi? Bilmirəm...


İndi daha ürəyim boz ümidlər məskəni,
Hərdən açıb silirəm his-tozunu, pasını.
Qoymadım ayaq basa səndən sonra kimsəni,
Gör nə vaxtdı qar alıb qəlbimin qapısını...
Kürüyümmü? Bilmirəm...


Daş da olsa dayanmaz bu atəşin oduna,
Mən kül altda köz kimi həzin-həzin darıxan.
Nahaq salıb taleyin məni sənin yadına,
Saxlama, burax gedim, çəkil sən də yolumdan..
Yeriyimmi? Bilmirəm...
Xatirə Xatun