Necə unudum səni?!
Bilirəm,yanımdasan,
Ruhumda,qanımdasan.
Sən hər bir anımdasan,
Necə unudum səni?

Sevdim,batdım günaha,
Fəryadım qalxıb şaha.
Sən özün söylə daha,
Necə unudum səni?

Gecə ulduz sayıram,
Gündüz tənha,sayılam,
Məni məndən ayıran,
Necə unudum səni?

Bağımda gülüm qönçə,
Sevənin qəlbi incə,
Söylə mənə xəfifcə,
Necə unudum səni?

Sevgimdən çaşarammı?
Səndən danışarammı?
Mən sənsiz yaşarammı?
Necə unudum səni?

Hava tutqun,qar bəyaz,
Çox sevdim,sənsə,lap az,
Düşün,söylə,ya da yaz,
Necə unudum səni?

Soranım,soruşanım,
Oduma alışanım,
Ay mənim pərişanım,
Necə unudum səni?

Yel əsdi, səba gəldi,
Yellərlə səda gəldi,
Ruhum fəryada gəldi,
Necə unudum səni?

Adın sətir başında,
Gözlərim göz yaşında,
Qəlb vüsal savaşında,
Necə unudum səni?

Sevgin mənə yağıdı,
Ruhum cənnət bağıdı.,
İndi sevmək çağıdı,
Necə unudum səni.
Güldanə Ramazanova. 12 11 2016