Qəlbimi.
Gecə keçib,təkcə oyaq mənəm,mən,
Qəlbim dolu kədərəm mən,qəməm mən.
Nə biləsən,necə pərişanam mən?
Sarmaz oldun yaralanan qəlbimi,
Parça-parça paralanan qəlbimi.

Bir dünyanın gileyi var sinəmdə,
Güneyi var,qüzeyi var sinəmdə.
Qövr eyləyir çox yaralar sinəmdə,
Kimsə sarmaz yaralanan qəlbimi,
Dərd içində oyalanan qəlbimi.


Bir bağçanın bucağında güləm mən,
Bir sevdanın ocağında küləm mən.
Xəzan düşdü,gərək daha öləm mən,
Duyammadı,yarım mənim qəlbimi,
Gileyləri sıralanan qəlbimi.

Hey alışdım,su çiləndi üstümə,
Sözlərindən qar ələndi üstümə,
Yaxın gəlmə,kor olarsan tüstümə,
Aramadın,sənin olan qəlbimi,
Sənin üçün oda yanan qəlbimi.

Güldanəyəm,çox sevdim,qənim oldu,
Bir dağ idim,sevgimsə çənim oldu.
Fikrim dərya,hicranım gəmim oldu,
Anlamadın sevən,duyan qəlbimi,
Bu acı hicrandan doyan qəlbimi.
Güldanə Ramazanova. 09 11 2016