Məni özgəsinə dəyişdin demə,
Xəbəri olmayıb naşı sevgimin.
Xəyanət gördükdə səndən bir kərə,
Agrıdı bağrımın başı sevgimin.
Dəydi bəd gözlərin oxu sevgimə,
Hopdu xəyanətdən qoxu sevgimə,
Paxıllıq eylədi çoxu sevgimə,
Yaman ağır imiş, daşı sevgimin.
Bəlkə də, qəlbimə bir ağır yükdü,
Ürəyim çat-çatdı, bölük-bölükdü,
Leyli Mecnun sevgisindən böyükdü
Ondan az olsa da yaşı, sevgimin.
Sevgim bu sevilən vaxta düşübdü,
Əfsus qarşılığı saxta düşübdü,
Sevgimə qar yağıb, şaxta düşübdü,
Vədəsiz gəlibdi qışı, sevgimin.
Gəlinlik libasın bir gün geyərsən,
Özgəyə sevirəm sözün deyərsən.
Onda, toy aşından bir az yeyərsən,
Verilər ehsanat aşı sevgimin.
O ötən keçmişi varaqlayıram,
Dərddən dizlərimi qucaqlayıram.
O ülvi hissimə yas saxlayıram,
Götür cənazəsin daşı sevgimin.