Sevgimizin…
Çiçəkləri ətir saçsın,
Hər əlində sevgimizin.
Şeir desin, nəğmə gəzsin,
Hey dilində sevgimizin!

Eşqimizə sadiq qalaq,
Qəmi atıb sevinc alaq.
Baş vuraraq qoy qərq olaq,
Gur selində sevgimizin!

Sevgililər gəlib gəzsin,
Çiçəklərdən çələng düzsün,
Yaşılbaşlı sona üzsün,
Saf gölündə sevgimizin !

Tale neynər bəxt kəmində,
Bəsdələnsin eşq dəmində,
Neçə nəğmə...həm bəmində ,
Həm zilində sevgimizin!

Göz yaşları daha yetər,
Heç olmasın nə qəm, kədər.
Yaşasın xoş xatirələr,
Hər ilində sevgimizin!

Şərəfli bir yolu getsin,
Nə yox olsun, izi itsin.
“Vəfa”- adlı çiçək bitsin,
Qoy külündə sevgimizin!

Ramiz Məmmədov (Şindidağlı)
13.11.2016.