ÇEPEKİ YAĞIŞLAR...

Qəribin yuxusu ərşə çıxanda,
Fikrinə dünyanın min dəmi gəlir.
Gündüz gördükləri dal-qabaq düşür,
Düz işin də əyri yondəmi gəlir.

Bayırda payızdı, qürbət bir eldə,
Çəpəki yağışlar qıy vurur çöldə.
Sən yorğan altında, yuxulu, - öl dəəə!.. -
Gözündən ayrılıq dərd-qəmi gəlir...

“Bunu belə, onu elə etsəydim,
Üzü dağa, yönü çölə getsəydim,
Çəmənlərdə çiçək kimi bitsəydim!” –
Diləklər, ümidlər çox - cəmi gəlir.

Yuxumuz göylərə çıxanda, hərdən,
Vətən arzusuyla qovuşar gərdən...
Çəpəki yağışlar yağır səhərdən,
Qərib dərdlərinə şəbnəmi gəlir.
Gülxanım Rzazadə