"Yarıya bilmədik qohum-qardaşdan,
Ağıllı nə verdi, naşı nə verə"?!

Çiynimdə dərd yüklü xurcun tayı var,
Dolusu nə verdi, boşu nə verə?!
Ocaqda bir yandı quru da, yaş da,
Qurusu nə verdi, yaşı nə verə?!.

Nə var ki, dünyada ömürdən baha?!
Oda ki, qürubda dayanıb daha...
Sən ha gözünü dik gələn sabaha,
Bahara nə verdik, qışı nə verə?!

Ömür dediyimiz yaşa bağlıdı,
Bahara bağlıdı, qışa bağlıdı...
Bir yanı torpağa-daşa bağlıdı,
Torpağa nə verdik, daşı nə verə?!

Ay Yusif, dursaq da səhər o başdan,
Çörəyimiz çıxdı dəmirdən, daşdan...
Yarıya bilmədik qohum-qardaşdan,
Ağıllı nə verdi, naşı nə verə?!