Gör

Sən eşqimə inanmazsan uzaqdan,
Gözlərini gözlərimə sıxıb gör.
Çox həqiqət imansıza görünməz,
Bəsirəti gözlərinə taxıb gör.

Göyə çatmır kasıbların duası,
Yerə batır ahu-zarı, nəvası,
Nə rəngdədir ucalığın havası,
Uca dağın zirvəsinə çıxıb gör.

Gül baxışda dünya gülmüs, çiçəkmiş,
Bir könüldə var olmayan nə təkmiş,
Pərvanələr eşq şamında nə çəkmiş,
Öz canını yandırıb gör, yaxıb gör.

Ümidləri qəm quzusu otlayır,
Otladıqca barmağını qatlayır,
Bu torpağın bağrı necə çatlayır,
Sel-su olub dərələrdən axıb gör.

Ömür boyu mən piyada ,yar atdı,
Çatammadım sevgisinə, yar atdı,
Tanrı səndə öz hüsnünü yaratdı,
Yaradanı yaranmışda baxıb gör...