Yenə xəyalların ağuşundayam,
Yenə də çəkirəm qəm, sənin üçün...
Sən məni dolanan bir pərvanəsən,
Mən isə əriyən şəm, sənin üçün.



Alışan ürəyəm, titrəyən diləm,
Çağlayan bulağam, uzanan "Nil"əm...
Gülüm, bir qüssəli ötən bülbüləm,
Bu "zil" sənin üçün, "bəm" sənin üçün.



Bir dağam, dərdinə dərmandı qarım,
Dumanlar çöksə də, sınmaz vüqarım.
Gözümün yaşını sil, nazlı yarım!
Çəkilmir gözümdən nəm, sənin üçün.



Yaşaram;- sevdanın kəli deyirlər,
Ayrıla bilmirəm;- zəli deyirlər.
Ürəkdən sevirəm;- dəli deyirlər,
Olmuşam "ağıldan kəm", sənin üçün...



Yaşar QAFQAZLI

Bakı: 12.01.2007