Namərd olan göstərdiyin yolun nə,
İz qoyduğun o sağın nə, solun nə,
Şər işlərə təməl qoyan qolun nə,
Bu həyatda sənlə yeriş, çətindir,
Amalına köklü vuruş, çətindir.

Əlac olan, dərd əlində əlacsız,
Xeyirli iş çıxmaz səndən heç bacsız,
Şərəf-şöhrət axtarmadın sən tacsız,
Vicdanında dönüş etmək, çətindir,
Səninlə bir yol da getmək, çətindir.

Həyat içrə soyuğun nə, odun nə,
Sənnən sonra qərar tutan adın nə,
Çox dilləri zəhər edən dadın nə,
Məsləkini duyub-anmaq, çətindir,
Od-közündə bir gün yanmaq, çətindir.

Çox gözləri yaşlı qoydu əcdadın,
Çox sinələr dəlib oydu əcdadın,
Pisliyindən nə vaxt doydu əcdadın?
Namərd, sənlə addım atmaq, çətindir,
O kölgəndə qəfil yatmaq, çətindir.

Qəlb sındırmaq, ürək qırmaq peşəndir,
Sadəlövhlər, tilovuna düşəndir,
Ovsununla çox bağırlar şişəndir,
Əməlinlə yarışmaq da, çətindir,
Hər işinə qarışmaq da, çətindir.

Məramını anlamazlar dünyada,
Yolundaca saç ağartdı dünya da,
Təmizləri çox vermisən, sən bada,
Tələ quran, ucalmaq da, çətindir,
Ömür sürüb qocalmaq da, çətindir.

Şairlərin od-alovu, közü çox,
Taleyinin, enişi çox, düzü çox,
Sinəsində deyiləsi sözü çox,
Düzə eniş, səd düşəndə çətindir,
Namərd ələ mərd düşəndə çətindir.