Yığsan da sən bağrına
Üst-üstdən duman çəni,
Qəlb dözdükcə ağrına,
Nə edim, sevdim səni?

Alışdıqca alışdım,
Eşq oduna qarışdım,
Gah küsdüm, gah barışdım,
Nə edim, sevdim səni.

Külək kimi əsdikcə,
Yollarını kəsdikcə,
Səhər-axşam küsdükcə,
Nə edim, sevdim səni.

Uzandı hicran yolu,
Nə möhkəm oldu qolu,
Ömrə yağdıqca dolu,
Nə edim sevdim səni.

Gözüm yolda qalsa da,
Qəlbi həsrət alsa da,
Könlüm-gözüm dolsa da,
Nə edim, sevdim səni.

Ruhum yarpaqtək əsir,
Zaman durmur, tələsir…
Oldum yolunda əsir,
Nə edim, sevdim səni.

Köksüm içi buluddu,
Vüsalı həsrət uddu,
Bağrım zil üstə uddu,
Nə edim, sevdim səni.

Ürəyimin eşqi bol,
Ora eniş-yoxuş yol,
Sevdamıza sadiq ol,
Nə edim, sevdim səni.