Dəli könül, gəzmə yenə havalı,
Salma məni səhralara, düzlərə.
Bir ürək var, yoxdur onun zavalı,
Yatıb qalıb ocağında közlərə.

Düşüb oda alışmağın nədəndir?
Ağılımla vuruşmağın nədəndir?
Hisslərimlə yarışmağın nədəndir?
Düşmə yenə cığırlara, izlərə.

Qartal təki qanad açıb uçursan,
Uca-uca zirvəyə yol açırsan,
Dəli təki biyabana uçursan,
Od tökürsən baxışlara, gözlərə.

Oda düşüb, ocağında qovruldum,
Külə dönüb, qap-bacaya sovruldum,
Torpaq idim, meşələrə vuruldum,
Odun oldum, odu keçmiş közlərə.