Bu gecə səssizcə yuxuna gəldim,
Gördümki yatmısan oyatmadım mən.
Bir soyuq qış günü həsrətin çəkdim,
Həsrətə dönərək bil, yatmadım mən.

Bu gecə səssizcə göz yaşım axdı,
Dedim taleyimdən bəlkə payımdır.
Elə kövrəlmişdim körpə uşaq tək,
Bilmədim bu qışım, yada yayımdır.

Axı həsrətimdir yuxusuz gecə,
Mən onun ardınca hey boylanıram.
Bu həsrət əlindən, hicran əlindən,
Rəngdən rəngə girib mən boyanıram.

Vüsalam, neyləyim ömrüm yarıdır,
Bu eşqi çiynimdə gərək daşıyam.
Məni qınamasın sevib-sevənlər,
Sevgi dünyasının vətəndaşıyam.