Gözlərim sizinlə daşar,
Qarabağın göz yaşları.
Qəlbimi yandırıb yaxar,
Qarabağın göz yaşları.

Qaçqınların ağlar olan,
Ürəkləri dərdlə dolan,
Fikirdən saralıb solan,
Qarabağın göz yaşları.

El-obanı dərd-qəm aldı,
Körpələri haray saldı,
Əsirlərin darda qaldı,
Qarabağın göz yaşları.

Əziz Şuşam əldə qalan,
Qubaddını, Laçınını düşmən alan,
Xocalımda qana dalan,
Qarabağın göz yaşları.

Qarabağım qara baxdı,
Qızlar qara xına yaxdı,
Su yerinə qanlar axdı,
Qarabağın göz yaşları.

Qırıldılar körpə, qoca,
Bu dərdlərdən varmı uca?
Göz kor oldu ağladıqca,
Qarabağın göz yaşları.

Vətən oğlu, bu, baş-tacı,
Namusumuz Ana-bacı,
Qarabağda axar acı,
Qarabağın göz yaşları.

Millətim qalxın ayağa,
Qeyrəti çevirsin dağa,
Qoymasın ki ta daşmağa,
Qarabağın göz yaşları.

Yatmayınız daha bəsdir,
Qan içində bu nə dəstdir,
Düşmənin haqqı qisasdı,
Qarabağın göz yaşları.

Qisas almaq məqsədimdir,
Tutduğum yol xalq səsimdir.
Qarabağım nəfəsimdir,
Qarabağın göz yaşları.