Gecələr həsrət çəkən,
Nazlı yarım, söylə hardasan?
Məni məcnun eyləyən,
Xoş nigarım, söylə hardasan?

Gecədən subhə qədər,
Göz yaşını leysan edən,
Gözünün yaşın qurut,
Xuramanım, söylə hardasan?

Mən yanar bir kərəməm,
Əsli olub söndür məni,
Gəl sən məndən incimə,
Yanar canım, söylə hardasan?

Gözlərinə baxıram,
Gözlərin məst edib məni,
Gözlərimin bəbəyi,
Ay xumarım, söylə hardasan?

Damarda donar qanım,
Sən məndən incisən əgər,
Gəl məni atıb getmə,
Vəfadarım, söylə hardasan?

Mənki məcnun deyiləm,
Leyli deyib qan ağlayam,
Səninçün gözlərimdən..
Axar qanım, söylə hardasan?

Həsrətlə dolu olan,
Gözlərini dik gözümə,
Leylitək etibarlı,
Etibarım, söylə hardasan?

Vüsalı ucaltmısan,
Bu sevgidə səmalara,
Səmalartək yüksələn,
Ay vüqarım, söylə hardasan?