Mən dilimdə “ah” kəlməsi bitirdim,
Eldən-elə qüssə-kədər gətirdim.
Cavanlığı yolda-izdə itirdim,
Saçımdakı ağ qar məni üşüdür.

Bir xəbər yox çəmənimdən, gülümdən,
Arzularım uçub getdi əlimdən.
Ayrı düşdüm Vətənimdən, elimdən,
Aradakı hasar məni üşüdür.

Od qaladım, özüm yandım közümdə,
Axar sular selə döndü gözümdə.
Ayrılıqdan xəstə düşdüm özüm də,
Həsrət adlı azar məni üşüdür.

Duman gəldi, çən ağlatdı yaylağı,
Bülbül uçdu, talan oldu gül bağı.
Alan aldı, satan satdı torpağı,
Tərəzisiz bazar məni üşüdür.

Bu ayrılıq ürəyimi dağlayır,
Yalan vədlər əl-qolumu bağlayır.
Vüsal Vətən deyib, ağlayır,
Əsir torpaq, diyar məni üşüdür.