Dərd əlindən yavaş-yavaş üzülən,
Nə şöhrətdir, nə də şandır, ay ürək.
Gözlərimdən pünhan-pünhan süzülən,
Nə göz yaşım, nə də qandır, ay ürək.
*****

Günəşli gündüzüm dönmüş dumana,
Bu sevən qəlbimi salmış zindana,
Özüm-öz əlimdən gəlmişəm cana.
Bu nə bədən, nə də candır, ay ürək.
*****

Geniş dünyam olmuş mənə indi dar,
Kiminə kef məclis, mənə ahu-zar,
Yandıranda soruşmayıb yandırar,
Nə qocadır, nə cavandır, ay ürək.
*****

Eşidirsən həm dostunu, yadını,
Ayırmırsan qarasını, ağını,
Sən çəkirsən öz sinəndə dağını,
Nə yağlıdır, nə yavandır, ay ürək.
*****

Gəl itirmə bu dünyada sən arı,
Yadından çıxarma haqqı-ilqarı,
Bu mənasız ömrü eyləsən yarı,
Nə yaxşıdır, nə yamandır, ay ürək.
*****

Vüsalın qəlbinə dərd-qəm əkmisən,
Gözlərindən yuxuların çəkmisən,
Həsrət-hicran yollarına dikmisən,
Ağlar gözü nə zamandır, ay ürək.