Gecikdim başımı yaman qatdılar
Soldan çağırdılar, sağa dartdılar
Bağrımın başında dağ ucaltdılar
Dar tutub gözümü, düzü görmürəm.
ömrümün vəhdəti, sevinc-kədəri
çəkdiyim nədirsə dərddən betərdi
Şan-şöhrət, var-dövlət gəldi gedərdi
Hami “mənəm” deyir, “bizi” görmürəm.
“Alovu” tez sönər tez coşanların
Mənasız, boş yerə yarışanların
İndi qələm tutub, “söz qoşan”ların
Sözünün içində sözü görmürəm.
Görünür bu həyat zor oldu artıq
Fikirdən beynimdə yoruldu artıq
Deməyin leyli də kor oldu artıq
Hər necə baxıram, düzü görmürəm.