Saza salmısan mehir
Olmusan tilsim sehir
Saz ustadısan mahir
Ustad kimi sazı al
Çal aşıq, çal Elçin.

Al sazı ələ dindir
Dindir ay lələ dindir
Dindirsən elə dindir
Düşsün ürəyimə xal
Çal aşıq, çal Elçin.

Çoxunun gözündə nəm
Yas tutub eyləyir qəm
Çal sevindir bu aləm
Bürüməsin qara şal
Çal aşıq, çal Elçin.

Damardı o qandı o
Ürəkdi o candı o
Dərdlərə dərmandı o
Dınləsə dil açar lal
Çal aşıq, çal Elçin.

Dindirdin sazın dindi
Sirri sehiri mindi
Səsi elə şirindi
Elə bil süzülür bal
Çal aşıq, çal Elçin.

Düşmüşəm dərdə qəmə
Huşum gəlməyir cəmə
Toxundu mizrab simə
Dəyişdi məndə əhval
Çal aşıq, çal Elçin.

Bir qız sevdim elimdən
Düşmür adı dilimdən
Sanki mənim əlimdən
Çıxdı bir gözü qumral
Çal aşıq, çal Elçin.

Yetən yoxdu dadıma
Atam düşdü yadıma
Vüsalam fəryadıma
Dağlardan hürkdü maral
Çal aşıq, çal Elçin.