Bulud gedib, göy ayazdı,
Demirəm ki, dərdin azdı...
Bir yazıydı fələk yazdı,
Ağlama, canım, ağlama...

Dağlar çəkməz bu dağını,
Budayıblar budağını,
Qəmlə güldürmə yağını,
Ağlama, canım, ağlama...

Getdi daha, dönən deyil,
Dindirsən də dinən deyil,
Göylərdədir, enən deyil,
Ağlama, canım, ağlama...

Ürəyindən tök bu dərdi,
Boz torpağa ək bu dərdi,
Sən çəkmirsən tək bu dərdi,
Ağlama, canım, ağlama...

Qara çalıb, ağ açanda,
Dərd sinənə dağ açanda,
Dağlar dözər dağ uçanda,
Ağlama, canım, ağlama...

Ağlasan da gəlməyəcək,
Deməyəcək, gülməyəcək.
Göz yaşını silməyəcək
Ağlama, canım, ağlama...

Bir ulduz var odu, qaldı...
Həm işığı, odu qaldı.
İgid öldü, adı qaldı,
Ağlama, canım, ağlama...