Bir də görüşmərik - heç vaxt, heç zaman, 
Zülmət bir gecəylə al səhər kimi. 
Məni unudarsan qatar yolunda 
Ötəri gördüyün bir şəhər kimi... 
Nə mən gözü yaşlı kəsim yolunu, 
Nə də sən əl götür öz inadından. 
Elə bilirdin ki, məni unutsan, 
Sənin öz adın da çıxar yadından... 
Dünyadan bir sevgi pay istəyirdim, 
Taleyin töhfəsi tərs olur hərdən. 
Bu hicran nə qədər ağır olsa da, 
Ayrılıq özü də dərs olur hərdən... 
Bəs kimi qınayaq, kimi qınayaq, 
Ötən günlərimiz düşəndə yada?! 
Sevən ürəklərin nə günahı var, 
Adamlar vəfasız olur dünyada... 
Bir də görüşmərik - heç vaxt, heç zaman, 
Zülmət bir gecəylə al səhər kimi. 
Məni unudarsan qatar yolunda 
Ötəri gördüyün bir şəhər kimi...