Biz ki bu həyatı dəyişəmmərik,
Ağlasaq nə fayda, gülsək nə fayda?
Ömr yolunda ki görüşəmmərik,
Yolüstü üz-üzə gəlsək, nə fayda?

Fələk ovlayıbsa bizi könüldən,
Əskik etməz odu, közü könüldən.
Dərdin silinmirsə izi könüldən
Gözdəki yaşları silsək, nə fayda?

Deyirsən hissini bölüş mənimlə,
Bölüşmək olarmı dərdi qənimlə?
Qəmin eynidirsə mənim qəmimlə
Qatıb bir-birinə bölsək, nə fayda?

Qalmayıb gizlimiz, saxlımız onsuz,
Könül boxçasında bağlımız onsuz,
Çoxdan əldən çıxıb ağlımız onsuz,
Nəyisə əlavə bilsək nə fayda?

Çıtmayla vurarsan, səs salar dəmir,
Vurulan candansa gəlməz səs-səmir,
Vüsal deyər, əgər budusa ömür,
Yaşasaq nə fayda, ölsək nə fayda?