Küləklər qumları göyə sovursa,
Şairsən, qəlbində nəğmə coşursa,
Sinəndə Vurğunun ürəyi vursa,
Yovşanlı düzə də vurulmaq olar.

Hər birində gözəllikdən bir nişan,
Gədikdən gədiyə adlayıb aşan,
Yamaclarda bir-birinə dolaşan,
Cığıra, izə də vurulmaq olar.

Bir daşın dibində novruz gülünə,
Bir susuz səhrada yağış gölünə,
Sığal çəkib bir gözəlin telinə,
Bir şirin sözə də vurulmaq olar.

Çobanın yaylağa köçən çağında,
Gecənin qaranlıq bir bucağında,
Axşamdan qalanan köç ocağında,
Soyuyan közə də vurulmaq olar.

Meşədə yarpaqdan yazmağa nə var,
Vüsal, səhrada gözəllik axtar.
Gecələr yuxumu gözümdən qovar,
Xəyallar, sizə də vurulmaq olar.