Ömrümün baharı saraldı soldu
Gəncliyim qəfildən tarımar oldu.
Ürəyim sızladı, gözlərim doldu
Qalmadı sevincdən məndə kiçik iz
Küsmüşəm həyatdan vaxtsız, vədəsiz.

Talehim yazılıb əzəldən qara
Etdi ürəyimi qəm para para.
Vurdular qəlbimə sağalmaz yara
Yaşaya biləydim qəmsiz, kədərsiz
Küsmüşəm həyatdan vaxtsız, vədəsiz.

Qollarım qırılıb düşüb yanıma
Həsrətin mikrobtək hopub qanıma
Dərmansız dərd olub çöküb canıma.
Mən kiçik bir qayıq qəm coşqun dəniz,
Küsmüşəm həyatdan vaxtsız, vədəsiz.

Dünyaya gələndən gülmədi üzüm
Tökdüyü yaşlardan tutuldu gözüm.
Qəsd etdim özümə həm dərd, həm özüm
Niyə yaranmışam bu qədər bəxtsiz?
Küsmüşəm həyatdan vaxtsız, vədəsiz.

Yaxşılıq eylədim bilən olmadı
Ağladım gözümü silən olmadı
Mənimlə dərdimi bölən olmadı
İnsanlar yaranıb sanki ürəksiz
Küsmüşəm həyatdan vaxtsız, vədəsiz.