Görməmişəm məhəbbət,
görməmişəm dostluğu,
Ömrüm keçir, dolmur ki,
həyatımın boşluğu.
Mən o qartal qanadlı
arzuların uçduğu
Asimandan, havadan,
ulduzlardan uzağam...
*****
Yaralı qəlb məhşərin
odunda yana bilməz,
Əzəldən əzilənlər
qiyamətdə əzilməz,
Bir qürur nidasiyam,
səhifədən silinməz,
Əziyyətdən, qınaqdan,
xəcalətdən uzağam...
*****
Mən daş qiymətindəyəm...
Yoluma yoldaşım yox,
yoldaş qiymətindəyəm.
Məni qardaş bilənə
qardaş hörmətindəyəm,
Ədavətdən, nahaqdan,
haramlıqdan uzağam...
*****
Karım hardadır mənim?!
Varım hardadır mənim?!
Bu həyatda qazancım
uzaqlardadır mənim...
Mən xətir saxlayanam,
yox xətir gözləyənim,
Sədaqətdən, duadan,
bəraətdən uzağam...
*****
Deyilən sayalara.
Səthi düz qayalara
Vurulmamış möhürəm...
Mən nişansız ölərəm,
Kimə gərək kim ölə?!...
Heç vaxt razı olmaram,
Narazıyam mən belə...
Üç saatdır yoldayam,
çatmır maşın mənzilə,
Ətalətdən, sükutdan,
susqunluqdan uzağam...
*****
Dara düşmə mənimlə!
Dar olar dardan betər.
Bir az qocafəndiyəm,
bir az uşaqdan betər...
Mən heç nə istəmirəm,
vətən məndən can istər,
Rahatlıqdan, rifahdan,
sakitlikdən uzağam...