Natamam yaranıb hər şey mənimçün,
Bunun səbəbi var, izahı yoxdu.
Belə olmalıdı bəlkə də, dünya?!
Səbəb axtarmağa zamanım yoxdu...

Bu bəxtim bağlanıb, düşmüşəm dara,
Dərdliyəm dərdimə tapılmır çara.
Eldən uzaqlaşım, gedim mən hara?!
Doğma Vətənimdə məkanım yoxdu...

Həyatdan əlimi üzmüşəm artıq,
Dərdi sıralayıb düzmüşəm artıq.
Belə yaşamaqdan bezmışəm artıq,
Tənhayam, arxamda duranım yoxdu...

Arzular, diləklər itib, qalmayıb,
Ürəyimdə həvəs bitib qalmayıb.
Əvvəldən dözməyə gücüm olmayıb,
İndi necə dözüm? ..., dözümüm yoxdu...

Gərəksizlər olub "gərəkli" indi,
Ürəksizlər olub "ürəkli" indi.
Biliksizlər olub "bilikli" indi,
Bununçün dünyaya inamım yoxdu
Getmək istəyirəm mən öz yolumla,
Bu istedadımı bulanım yoxdu...

İtmişəm, batmışam qalıb qıraqda,
"Dost kimdi, düşmən kim?", ürək soraqda.
Daha yaşamağa itib maraq da,
Xoşbəxt gələcəyə gümanım yoxdu...

İnsanlıq yox olub, heyvanlıq qalıb,
Dünyada xeyirxah əməl azalıb.
Alçaqlar, namərdlər mərd tək ucalıb,
Yazanım məlumdu, pozanım yoxdu...

Saxtalıq görürəm bütün gözlərdə,
Doğru axtarıram yalan sözlərdə.
Hərə öz məqsədin güdür bizlərdə,
Yıxılsam halımı soranım yoxdu...

Heç belə deyildi ötən zamanlar,
Başımızı aldı çənlər, dumanlar.
Pulla oynayırlar indi uşaqlar,
Əlində kuklası olanım yoxdu...

Bir kəlmə, bir sual, bircə məsələ
İnsanı alçaldıb eləyir kölə.
Heç kim bildiyini gətirmir dilə,
Sözünün dalında duranım yoxdu