Günəş qalxar, üfüqlərdə yer eylər,
Üfüqlər də buludluqda sirr eylər.
Məhəbbətin gözlərimi kor eylər,
Apar məni məhəbbətdən uzağa!...

Apar məni gözdən iraq məkana,
Apar məni sözdən iraq məkana.
Ürəyimdə niskili var illərin,
Apar məni kədərimdən uzağa!...

Öz ömrümü sənə görə yaşadım,
Sən olaydı əzəl gündən kaş adım.
Tək qalandan diləyimi boşadım,
Apar məni diləyimdən uzağa!...

Dilim yenə həsrətindən sözləyir,
İçim yanır, ətraflarım közləyir.
Ürəyimin sınıq yeri sızlayır,
Apar məni ürəyimdən uzağa!...

Tənhalığı sevə bilsəm sən qədər,
Sevinərəm kədərimə tən qədər.
Arzulamaz kimsə səni mən qədər,
Apar məni istəyimdən uzağa!...