Ürəyim çalırsa qəmli bir hava
Sinədə mən sazı, tarı neynirəm?
Ürəyim sevgidən od tutub yansa
Onu sondürməyə qarı neynirəm?

Kədərdən gözümü boğursa qəhər
Bal dilim yarıma olarsa zəhər
Sevgim də vermirsə əgər bar, bəhər
Özgədən gələcək barı neynirəm?

Yığılıb qəlbimdə qəm ətək-ətək
Deyirəm qəlbimə sevmisənsə çək
Bütün dərdlərimi çəkirəmsə tək
Gəlməsə yar mənə sarı neynirəm?

Elə bil mən düşüb yanıram odda
Gülüşür sevgimə tanış da, yad da
Gəlmirsə öz yarım, hər cürə adda
Mənə veriləcək varı neynirəm?

Vüsalın qəlbində illərin qəmi
Bircə saf eşqidir yoxdur məlhəmi
Özgənin yarısa, könül həmdəmi
Bu cürə insafsız yarı neynirəm?