Bu qədər insanlar niyə toplaşıb?
Nə üçün hamının üzündə qəm var?
Niyə kimsə duymur səsimi mənim?!
Elə bil hamısı olubdular kar.

Nə üçün yadıma sala bilmirəm,
Bu üzlər tanışdı haradan mənə?!
Bu nə cür sınaqdı nə cür imtahan?
Bəxş edib görəsən Yaradan mənə?!

Bəs bacım nə üçün qara bağlayıb?
Nə üçün gözləri giryan olubdur?
Axı O cavandı qara yaraşmır,
Üzünün gülüşü niyə solubdur?!

Bəs anam, qardaşım onlar hardadı?
Kim üçün gəlibdir təcili yardım?
Nə üçün anama iynə vururlar?
Ürəyim dayanır yaman daraldım

Kimdir o bəm-bəyaz geyinib yatan?
Bu qədər insandan utanmırmı heç?!
Uzanıb otağın tən ortasında,
Bu qədər səs-küyə oyanmırmı heç?!

Bir deyin nə olar qəmin səbəbin,
Nə üçün ağlayır bu qədər insan?
Kim üçün göz yaşın axıdır hamı?
Kimdir ailəmi üzən o düşman?!

Aman Allah, mənəm, o yerdə yatan?
Nə üçün ismimi zikr edir hamı?
Öldümmü mən indi? Yox deyin nolar,
Axı var anamın arzusu, kamı.

Nə üçün qaldırdız məni yerimdən?!
Niyə ayırırsız anamdan məni?
Anacan ağlama qurbanın olum,
Allaha əmanət edirəm səni

Gedirəm anacan gedirəm daha
Gedirəm dönüşü olmayan yola.
Vallah istəməzdim bircə an belə,
O nurlu gözlərin kədərlə dola.

Bağışla anacan bağışla məni,
Sənin tək vəfalı ola.bilmədim.
Sən məni tək qoyub getmədin amma
Mən sənin yanında qala bilmədim.