Susub ilham pərim, gözu kor olub,
Sənsiz dünya mənə zülmət gor olub,
Ağarıb saçlarım, dümağ qar olub,
Həsrətin qapıma gələndən bəri.

Ürəyim sirli bir qalaya bənzər,
Eşqim əyilməz bir qayaya bənzər,
Göz yaşım sellənən bir çaya bənzər,
Həsrətin qapıma gələndən bəri.

Ayıra bilmirəm dost ilə yadı,
Dilimdən qaçıbdır çörəyin dadı,
Dərd sinəmi deşdi, bağrım qanadı,
Həsrətin qapıma gələndən bəri.

Həyatda hamı tək bir insan idim,
Urəyi eşq dolu Vüsal idim,
Hicranın oduna şam tək əridim,
Həsrətin qapıma gələndən bəri.