Əlimi qoymuşam qəlbimin üstə
Yaman bərk döyünür sancılar ilə
Hər dərdi köksünə çəkən insanın
Qəlbinə qılınc da sancılar elə
**********************************
Keçən günlərimi unudaraq mən,
Bir daha sevgiyə dönə bilmərəm.
Onsuz da anlayıb bilən deyilsən,
Səninlə dərdimi bölə bilmərəm.

Çəkdin ürəyimə xəyanət dağın,
Qırdın bu könlümün güllü budağın,
Özgə baxçasından gəldi sorağın,
Niyə belə etdin hələ bilmirəm.

Adını qəlbimdən silməyəcəyəm,
Lakin kədərimdən dinməyəcəyəm,
Sənli günlərimə dönməyəcəyəm,
Mən öz qürurumu kölə bilmirəm.

Vüsal, düşünmə daha heç nəyi,
Nə şirin yalanı, acı gerçəyi,
Hərdən düşünürəm ''boş ver hər şeyi''
Bax onda özümə gələ bilmirəm